मजदूर मन के हक बर बड़े जीत: उमा गोपाल ह मुख्य महाप्रबंधक कार्यालय ल घेर के करिन प्रदर्शन, 6 नवंबर तक बोनस भुगतान करे के मिलिस आश्वासन
कर्मचारी अउ खदान मजदूर मन के हक बर छत्तीसगढ़िया क्रांति सेना (गैर-राजनीतिक संगठन) ह एक पल्ट फेर मजबूती ले आवाज उठाए हे। संगठन के प्रदेश उपाध्यक्ष उमा गोपाल जी के अगुवाई म कर्मचारी मन ह मुख्य महाप्रबंधक कार्यालय के घेराव करके जमेर के प्रदर्शन करिन।
दीपावली ले पहिली पेमेंट अउ बोनस दिलाए के मांग
कर्मचारी मन के कहना रिहिस कि उनखर बकाया पेमेंट अउ बोनस ल तुरंत जारी करे जावय। भुगतान म देरी होए के सेती कर्मचारी अउ उनखर परिवार मन ल भारी आर्थिक परेशानी के सामना करे बर परत रिहिस। 6 नवंबर ले दीपावली के तिहार शुरू होवत हे, एही सेती तिहार ले पहिली मेहनत के पसीना के पूरा दाम अउ बोनस दिलाए के मांग प्रबंधन के साम्हू म रखे गिस।
एक घंटा तक चलिस घेराव, प्रबंधन ल देय बर परिस आश्वासन
ए मांग ल लेके लगभग एक घंटा तक मुख्य महाप्रबंधक कार्यालय ल घेर के उग्र प्रदर्शन करे गिस। मजदूर मन के एकजुटता अउ उमा गोपाल जी के कड़ा रुख ल देखत हुए आखिरकार प्रबंधन ल पीछे हटे बर परिस। प्रबंधन कोती ले लिखित अउ साफ आश्वासन दे गिस कि 6 नवंबर तक सबो कर्मचारी मन के बोनस भुगतान कर दिए जाही। ए आश्वासन मिले के बाद प्रदर्शन ल समाप्त करे गिस।
”मजदूर मन के हक रोकना अनुचित”: उमा गोपाल
प्रदर्शन के दौरान प्रदेश उपाध्यक्ष उमा गोपाल ह कड़ा शब्द म कहिन—
”मजदूर भाई मन दिन-रात मेहनत करके कंपनी अउ खदान के काम म अपन योगदान देथें। अइसन म तिहार के बखत उनखर वेतन अउ बोनस ल रोकना बिल्कुल गलत अउ अनुचित हे। मजदूर मन ल अपन हक पाए बर दफ्तर मन के चक्कर झन काटे बर पड़य, ए ह प्रबंधन के पहिली जिम्मेदारी आंय।”